ది రియల్ యానిమల్స్ !!

సినిమా అనేది ఒక ఎంటర్‌టైన్‌మెంట్ మీడియా. సద్గురు ఆశ్రమం కాదు సందేశాలివ్వడానికి. 

కట్ చేస్తే - 

మన దేశంలో సంవత్సరానికి 1500 నుంచి 2000 వరకు సినిమాల్ని, సుమారు 20 భాషల్లో నిర్మించి, రిలీజ్ చేస్తారు. 

వీటిలో 99% సినిమాల ప్రధాన లక్ష్యం: వినోదం, డబ్బు మాత్రమే. 

ఈ 99% సినిమాల్లో కేవలం 5 నుంచి 10% సినిమాలు మాత్రమే విజయం సాధిస్తాయి. లాభాల్ని తెచ్చిపెడతాయి. అది వేరే విషయం. 

ఇన్ని సినిమాల్లో అన్నీ అందరికీ నచ్చాలని రూలేం లేదు. 

మనం చూసిన ఒక సినిమా నచ్చనప్పుడు - మనల్ని మనం తిట్టుకోవచ్చు. ఎవ్వడూ మనల్ని గల్లా పట్టుకొని "నా సినిమా చూడు" అనటం లేదు. మెడ మీద కత్తిపెట్టడం లేదు. 

ఒక అడుగు ముందుకేసి, ఆ డైరెక్టర్‌ను కూడా నాలుగు మాటలు అనొచ్చు. తప్పేం లేదు. ఎందుకంటే ఆ డైరెక్టర్ మనంత ఇంటలెక్చువల్ కాదు కాబట్టి... మన అంచనాల ప్రకారం, మన అతి తెలివి రేంజ్‌లో ఆ డైరెక్టర్ ఆ సినిమా తీయలేదు కాబట్టి. 

చలో... ఫుల్లీ జస్టిఫైడ్. 

కాని -

మనకు వ్యక్తిగతంగా నచ్చని ఒక సినిమా - అవతల ఇంకెవ్వరికీ నచ్చకూడదు అనుకోవడం ఒక అతి పెద్ద మానసిక వ్యాధి. 

ఇలాంటి వ్యాధిగ్రస్తులు సమాజంలో కొందరే ఉంటారు. 

అతి తక్కువ జనాభా. 

వీరి వల్ల కమర్షియల్ సినిమాల టికెట్స్ తెగవు... బ్లాక్‌బస్టర్ హిట్లు కావు... లాభాలు రావు. 

అందుకే వీరిని ఫిలిం మేకర్స్ అసలు పట్టించుకోరు. 

కాని, వీరు మాత్రం, వీరలెవెల్లో తమ సూడో-ఇంటలెక్చువాలిటీని కుమ్మరిస్తూ, ఫేస్‌బుక్ నిండా ఒక్కో సినిమా మీద నానా రాతలు రాస్తుంటారు... అక్కడక్కడా ఒక ఇంగ్లిష్ పదాన్ని అలా పడేస్తూ. 

అసలు వీళ్ళంతా చైనాకు పోయి ఇంగ్లిష్ ట్యూషన్స్ చెప్పుకోడానికే పనికొస్తారని సందీప్ వంగా ఒక ఇంటర్వ్యూలో అన్నాడు. అది వేరే విషయం.   

కట్ చేస్తే -    

ఇవ్వాళ ఉదయం ఫేస్‌బుక్‌లో - "యానిమల్" సినిమా మీద - ఒక సింగిల్ లైన్ పోస్టు చూశాను. 

ఆ పోస్టుని సమర్థిస్తూ, పోస్టు కింద షరా మామూలుగా కొన్ని అత్యుత్సాహపు కామెంట్స్ కూడా ఉన్నాయి. 

ఆ పోస్టు, ఆ కామెంట్స్ సారాంశం క్లుప్తంగా ఏంటంటే - 

> జంతువులు కూడా ఆ ఛండాలాన్ని చూడవు.

> ఆ సినిమాలో అసలు ప్లాట్ లేదు. 

> ఆ సినిమా ఒక షిట్.

> డైరెక్టర్ సందీప్ వంగా వెంటనే సైకియాట్రిస్టును కలవాలి.

> ఈ సినిమా చూసి దాన్ని సక్సెస్ చేసినవాళ్ళంతా వెధవలు.  

మొన్న జనవరి 26 నాటికి ప్రపంచవ్యాప్తంగా 917 కోట్ల కలెక్షన్ చేసిన "యానిమల్" సినిమాను అంత ఈజీగా వీళ్ళు షిట్ అనుకున్నా, ఛండాలం అనుకున్నా ఆ డైరెక్టర్-ప్రొడ్యూసర్స్‌కు నష్టమేం లేదు. 

కాని, వీళ్ళకు నచ్చని సినిమా ఇంకెవ్వరికీ నచ్చకూడదా? 

ఈ సినిమా చూసినవాళ్ళంతా "వెధవలు" అనటం నిజంగా ఎంత వెధవతనం?  

అసలు - 

ఆ సినిమాకు ప్రపంచవ్యాప్తంగా అంత భారీ కలెక్షన్లు తెచ్చిపెట్టిన అన్ని కోట్ల మంది ప్రేక్షకులా వెధవలు? లేదంటే, ఓటీటీల్లోకి వచ్చిన తర్వాత సినిమా చూసి ఇలాంటి రివ్యూలు రాసే సోకాల్డ్ ఇంటలెక్చువల్సా వెధవలు? 

ఇట్స్ రియల్లీ వెరీ ఛండాలమ్ ఈవెన్ టు థింక్ అబౌట్ దీజ్ గైజ్... యు నో...

- మనోహర్ చిమ్మని