సినిమా ఇండస్ట్రీలో ఆయనకెవరూ చుట్టాల్లేరు. తెలిసినవాళ్లు లేరు. ఎవరి రికమండేషన్ లేదు.
బక్కగా పొడుగ్గా ఉన్న అమితాబ్‌ను చూసి, "నువ్వు హీరో ఏంటి?" అని చాలామంది ఆయన ముఖం మీదే అన్నారు.
అమితాబ్ గొంతును "ఇదేం గొంతు?" అని అసలెవ్వరూ నచ్చలేదు.
1968లో, ఇప్పుడీ బ్లాగ్‌లో మీరు చూస్తున్న ఫోటోతో, ఒక హిందీ సినిమాలో అవకాశంకోసం మొదటిసారిగా వెళ్లిన అమితాబ్‌ను రిజెక్ట్ చేశారు.
50 సంవత్సరాల తర్వాత, ఇప్పుడు, అదే ఫిలిం ఇండస్ట్రీలో ఒక లెజెండ్‌గా అత్యున్నత పురస్కారం "దాదాసాహెబ్ ఫాల్కే అవార్డు"ను అందుకుంటున్నాడు అమితాబ్.
ఒక్క భారతదేశంలోనే కాదు, అమితాబ్‌కు అభిమానులు ప్రపంచవ్యాప్తంగా కోట్లాదిమంది ఉన్నారు.
తన అభిమాన హీరో అమితాబ్‌ను కలవడంకోసం, ఒక రష్యన్ యువతి 27 ఏళ్లు ఓపిగ్గా డబ్బు కూడబెట్టుకొని, ఇండియా వచ్చి అమితాబ్‌ను కలిసివెళ్లింది. డబ్బుకోసం అన్నేళ్లు ఓపిక పట్టలేని ఇంకో రష్యన్ యువతి ఏకంగా డ్రగ్స్ డీల్ చేస్తూ పట్టుపడింది. విషయం తెలిసిన అమితాబ్ ఆ అమ్మాయిని ఓదారుస్తూ మెసేజ్ పంపాడు.
Nothing but Spiritual Connection.
రజనీకాంత్, చిరంజీవి లాంటివాళ్లు స్వశక్తితో సూపర్ స్టార్లు, మెగాస్టార్లు అయ్యారంటే అమితాబ్ బచ్చనే ఇన్స్‌పిరేషన్.
దాదాసాహెబ్ ఫాల్కే అవార్డుకు అమితాబ్‌ను ఏకగ్రీవంగా ఎన్నుకోవడంలో పెద్ద ఆశ్చర్యంలేదు.
76 ఏళ్ల వయసులో, ఇప్పటికీ యాక్టివ్‌గా తన స్థాయి తగ్గకుండా సినిమాల్లో నటిస్తూ, "కౌన్ బనేగా కరోడ్‌పతి" వంటి టీవీ ప్రోగ్రాంలు చేస్తూ, వందలాది యాడ్స్ చేస్తూ రోజూ యమ బిజీగా ఉంటున్న 'బిగ్ బీ' కి వయస్సు అంటే ఒక అంకె మాత్రమే!
సరిగా 50 ఏళ్ల క్రితం, 7 నవంబర్ 1969 నాడు, అమితాబ్ నటించిన "సాత్ హిందుస్థానీ" రిలీజ్ అయింది.
నటుడిగా 50 ఏళ్లు పూర్తిచేసుకున్న సందర్భంగా బిగ్ బీ కి శుభాకాంక్షలు.
