RGV క్షమాపణలు!

మొన్నటి "ఐస్ క్రీం" సక్సెస్‌మీట్‌లో, అంతకుముందు ఒక టీవీ చానెల్ ప్రోగ్రామ్‌లో, తన ఫేస్‌బుక్ పేజ్‌లో .. వర్మ తనకంటూ తను క్రియేట్ చేసుకున్న ఒక బ్రాండెడ్ వ్యక్తిత్వానికి ఏ మాత్రం సరిపడని ఒక పని చేశారు.

అది .. జర్నలిస్టులకు క్షమాపణలు చెప్పడం!

అదే సక్సెస్ మీట్‌లో గురువుగారు దాసరి RGV గురించి ఓ మాటన్నారు. "వర్మని గత నాలుగయిదేళ్లుగా గమనిస్తున్నాను. ఫిలిం మేకర్‌గా అతనేం మారలేదు. కానీ, వ్యక్తిగా సెంటిమెంటల్‌గా మాత్రం కొంచెం మార్పు చెందినట్టు నాకనిపిస్తోంది!" అని.

ఇది 100% నిజం. లేకపోతే, "రౌడీ" సినిమా ఫంక్షన్లో ఆ సన్మానాలు,శాలువాలు .. అదంతా ఏంటి? అసలు ఒరిజినల్ వర్మ ఏంటి?  

ఇదంతా తప్పు అని నేననడంలేదు. నెగెటివ్ కోణంలో చెప్పడం లేదు.

సమాజాన్నీ, సంస్కృతినీ, జీవనవిధానాల్నీ, జీవితాదర్శాల్నీ తన రచనలతో చీల్చి చెండాడిన నాటి రచయిత చలం లాంటివాడే చివరికి రమణ మహర్షి ఆశ్రమానికి వెళ్లిపోయాడు! ఈ ట్రాన్స్‌ఫార్మేషన్‌కు కారణాలుండవు. వెదక్కూడదు కూడా.  

కట్ టూ క్షమాపణలు ఎపిసోడ్  - 

నా వ్యక్తిగత ఉద్దేశ్యంలో RGV క్షమాపణలు చెప్పాల్సిన అవసరం లేదు. అసలు దానికంటే ముందు ఆ రివ్యూయర్ పైన అంతపెద్ద లకోటా రాయాల్సిన అవసరం అస్సలు లేదు. శుధ్ధ టైమ్ దండగ.

అయితే - తన పూర్తిపేరు సైతం బయటపెట్తకుండా రివ్యూ పేరుతో ఏదో చెత్త రాసిన ఆ వ్యక్తిని, ఆ రకం వ్యక్తులను "చీకట్లో కుక్క"ల్లాంటివారిగా వర్మ భావించడం తప్పని నేననుకోను. మామూలుగా అయితే వర్మ దానికంత రియాక్టవకూడదు. కానీ, అయ్యాడు చాలా విచిత్రంగా. అంతటితో ఆగిపోయినా అయిపోయుండేది. కానీ మళ్లీ దానికి ఒక రిజాయిండర్ ఇచ్చాడు.

తన "కుక్క" పదం వాడకం, లేదా మొత్తంగా ఆ కుక్క మీద తను రాసిన లకోటా మిగిలిన అందరు జర్నలిస్టులను కూడా బాధించిందని తనకు అర్థమయిందని.. అందుకు జర్నలిస్టు మిత్రులందరికీ క్షమాపణలు చెప్పాడు RGV.

అలా అందరు జర్నలిస్టులకు ఆయన క్షమాపణలు చెప్పాల్సినంత నేరం ఏమీ చేయలేదని నా ఉద్దేశ్యం.

నిజంగా RGV క్షమాపణలు అంటూ చెప్పాలనుకుంటే - KCR కి, తెలంగాణ ప్రజలకు చెప్పాలి. ఆ మధ్య ఒకసారి KCR మీద రకరకాల అర్థం పర్థం లేని ట్వీట్లు పెట్టినందుకు!

అలాంటి క్షమాపణలకు అర్థం ఉంటుంది. ఆ క్షమాపణలు ఆయన స్థాయిని మరింతగా పెంచుతాయి.

అంతేగాని.. ఇవేం క్షమాపణలు?!  చీకట్లో అరిచే కుక్కల్ని కుక్కలు అన్నందుకు ఇంకెవరికో క్షమాపణలు చెప్పడం అంత అవసరమా?!