Friday 24 May 2013

సినిమాలెందుకు తీస్తారు?


రోజూ రాయాలని ఎంత అనుకున్నా, ఇప్పుడున్న బిజీలో అప్పుడప్పుడూ డుమ్మాలు తప్పటంలేదు, బ్లాగ్‌లో. ఏమైనా సరే ఇవాళ.. ఇప్పుడు.. ఏదో ఒకటి రాసి తీరాలని కూర్చున్నాను. నాకు తెలుసు, ఇంకో అరగంటలో ఈ బ్లాగ్ రాయటం పూర్తిచేసి, ఒక మాంచి ఫోటోతో పబ్లిష్ చేస్తానని.

ఇంత కాన్‌ఫిడెంట్‌గా నేను చెప్పగలగడానికి కారణం.. నాకు "రైటర్స్ బ్లాక్" అనే సమస్య లేదు. పెన్నూ పేపర్ ఎదురుగా ఉన్నాయి అంటే చాలు. బండి ట్రాక్ అదే ఎక్కుతుంది! ఇప్పుడు ఎక్కువగా "నోట్‌బుక్" వాడుతున్నాను కాబట్టి.. జస్ట్, పవర్ ఆన్ చేసి, నెట్ కు కనెక్ట్ అయితే చాలు. బండి ఆటోమాటిగ్గా ట్రాక్ ఎక్కుతుంది.

కట్ టూ పాయింట్ -

'సినిమాలెందుకు తీస్తారు'.. క్యాచీ టైటిల్! రాయనైతే రాశాను కానీ, ఇందులో నేను అనుకున్నది రాయగలిగితే హాపీ. చూద్దాం.

ఒక ఆర్ట్‌గా.. సినిమా మీద పిచ్చి వ్యామోహం ఉన్నవాళ్లని మొదటి కేటగిరీ అనుకోవచ్చు. ఈ కేటగిరీ వాళ్లంతా కేవలం ఈ కళ మీద వారికున్న ప్యాషన్‌ని సంతృప్తిపర్చుకోడానికే సినిమాలు తీస్తారు. వీరికి పేరూ, డబ్బూ అవన్నీ ప్యాషన్ తర్వాతే. దురదృష్టవశాత్తూ వీరి సంఖ్య చాలా తక్కువ. కానీ, ఆ తక్కువ మందిలోనే కొందరు సక్సెస్ అవుతారు. అలా సక్సెస్ అయిన వాళ్లే ఇండస్ట్రీలో మంచి పొజిషన్‌లో కనిపిస్తుంటారు.

ఎంత ప్యాషన్ ఉన్నా, ఎంత టాలెంట్ ఉన్నా, ఎంత డబ్బు ఉన్నా.. కొంతమందికి ఎందుకో ఈ ఫీల్డు అచ్చిరాదు. సైంటిఫిక్‌గా  చెప్పాలంటే, ఒక సినిమా తీయడానికి అవసరమైన అన్ని కాంబినేషన్సూ అనుకూలంగా కుదరవు. వీరు అప్పుడప్పుడూ, అలా కనిపించి, చివరికి కొంతకాలం తర్వాత తెరమరుగైపోతుంటారు.  

ఒక ఆర్ట్‌గా కాకుండా, ఒక "షో బిజినెస్‌" గా ఈ రంగాన్ని ఇష్టపడి సినిమాలు తీసేవాళ్లు రెండో కేటగిరీ. ఏ బిజినెస్‌లో రాని పేరు, పబ్లిసిటీ దీన్లో అంత ఈజీగా వస్తుంది. అలాంటి షో కోసం, ఫేమ్ కోసం ఎంటరై సినిమాలు తీసే వాళ్లు ఈ రెండో కేటగిరీ కిందకి వస్తారు.

పైన చెప్పుకున్న సినిమా మీద పిచ్చి ప్రేమతో ఎంటరైన వాళ్ల సంఖ్యతో పోల్చితే, ఈ రెండో కేటగిరీ వాళ్ల సంఖ్య కొంచెం ఎక్కువగానే ఉంటుంది.  

కేవలం డబ్బు పాయింటాఫ్ వ్యూలో ఎంటరై సినిమాలు తీసేవాళ్లు మూడో కేటగిరీ. ఈ ఫిలిం మేకర్స్ కేవలం డబ్బు కోసమే సినిమాలు తీస్తారు. వీరికి సినిమా నేది ఒక మామూలు ప్రొడక్టు. ఆ ప్రొడక్టుని ఎలా రూపొందిస్తే మార్కెట్లో బాగా బిజినెస్ చేయవచ్చు అన్నదానిమీద వీరి సినిమాల నిర్మాణం ఉంటుంది.

ఒక రకంగా వీరు డైరెక్ట్ గ్యాంబ్లింగ్ ఆడుతున్నట్టే లెక్క. ఎందుకంటే, ఏ సినిమా ఆడుతుందో, ఏ సినిమా ఆడదో అంత ఖచ్చితంగా చెప్పటం మహా మహా సినీ పండితులకే కష్టం. ఈ కేటగిరీ వాళ్లు చాలా సార్లు పడిలేస్తుంటారు. అయినా అదే ఆట ఆడుతుంటారు. అడిక్ట్ అయినవాళ్లు ఎవరూ ఈ 'ఆట' ని అంత సులభంగా మర్చిపోలేరు!

ఈ మూడో కేటగిరీలోనే ఇంకో సబ్ కేటగిరీ - బ్ల్లాక్ అండ్ వైట్. డబ్బు విషయంలో నలుపుని తెలుపుగానూ, తెలుపుని నలుపుగానూ చేసుకోవడం అన్నమాట. టెక్నికల్‌గా దీని గురించి నేను ఎక్కువగా చెప్పలేను కానీ, ఈ అవసరంతో కూడా సినిమాలు తీస్తారు.

సినిమా రంగంలో కొన్ని ప్రత్యేక ఆకర్షణలున్నాయి. ఫేమ్, డబ్బు.. తర్వాత అందమయిన హీరోయిన్లు, ఆర్టిస్టులు! కేవలం 'సినీ స్త్రీ' వ్యామోహంతో సినీ రంగంలోకి ఎంటరై సినిమాలు తీసేవాళ్లు చివరి కేటగిరీ. పైకి చెప్పక పోయినా, అంతరాంతరాల్లో వీరి టార్గెట్ లైంగిక వాంఛే. ఆ వాంఛ కోసమే వీళ్లు సినిమాలు తీస్తారు. వీరికి సినిమా ఇండస్ట్రీపైన, ఈ బిజినెస్ పైన అవగాహన చాలా తక్కువ. ఇంకా చెప్పాలంటే, ఆ అవగాహన అవసరమని వీరు అనుకోరు. వీరి ఫోకస్ అంతా హీరోయిన్లపైనే!

అంటే - వీరి ఉద్దేశ్యంలో, సినిమాలు తీసేవాళ్లందరికీ హీరోయిన్లు 'ఈజీలీ అప్రోచబుల్" గా అందుబాటులో ఉంటారు. ఇందులో నిజం ఎంతుందో అబధ్ధం కూడా అంతే ఉంది. ఒకడెవడో కోట్లు పెట్టి సినిమా తీస్తున్నాడని, తనను అందులో హీరోయిన్‌గా బుక్ చేస్తున్నాడనీ, ఒక పేరున్న హీరోయిన్ అతని కోరికకి లొంగిపోవల్సిన అవసరం లేదు. అందరూ అలా ఉండరు. అందరి విషయంలో అలా జరగదు. దానికి కొన్ని లెక్కలు, ఇష్టాయిష్టాలు ఉంటాయి. ఉండితీరతాయి.

ఆ మాటకొస్తే - ఇలాంటి స్త్రీ వ్యామోహాలు అన్ని ఫీల్డుల్లోనూ ఉంటాయి. కాకపోతే, ఒక్కో ఫీల్డులో ఇది ఒక్కో రకంగా ఉంటుంది. సినిమా ఫీల్డు షో బిజినెస్ కాబట్టి, గోరంత ఉన్నా కొండంత చేసి "బ్రేకింగ్ న్యూస్"లు ఇస్తుంటారు. అలా ఇవ్వకపోతే ఏ చానెల్ కూడా బ్రతకలేదు. ఇంకా చెప్పాలంటే, సినిమాల ప్రకటనలు, సినిమా బేస్డ్ ప్రోగ్రామ్‌లు వంటివి లేకుండా ఈ ప్రపంచంలో ఏ పత్రిక గానీ, చానెల్ గానీ బ్రతకడం కష్టం.

సో, చివరాఖరికి చెప్పొచ్చేదేంటంటే - సినిమాలని వివిధ రకాలవాళ్లు వివిధ రకాల కారణాలతో, కోరికలతో తీస్తుంటారు. ఎవరి టార్గెట్లు వాళ్లకుంటాయి. అందరూ వాటిని బయట పెట్టరు. కానీ బయటపడతాయి!

ఇవన్నీ తెలియకుండా మనం.. ప్రేక్షకులం ఏమేమో అనుకుంటూ ఉంటాము. ఎవరెవరినుంచో ఏమేమో, ఎలాంటి సినిమాలనో ఎక్స్‌పెక్ట్ చేస్తూ ఉంటాము. కానీ సినిమాలు తీసేవాళ్లకు ఎవరి టార్గెట్లు వారికుంటాయి. ఆ టార్గెట్ల కోసం వాళ్లు పడే కష్టాలు వాళ్లకే తెలుస్తాయి.

బయటికి అంతా బాగానే కనిపిస్తుంటుంది. అలా కనిపించేలా ఉండక తప్పదు. కానీ..  కొన్ని సినిమా కష్టాలు జీవితాల్ని అతలాకుతలం చేస్తాయి. కొన్ని సినిమా కష్టాలు అసలు జీవితాల్నే ముగించేస్తాయి. దట్ ఈజ్ సినిమా!

3 comments:

  1. సినిమాలు తీయించే నిర్మాతలకు సినిమా ప్రయోజనం తెలియదు,సినిమా ఒక సామూహిక కళ అనీ దర్శకుడు కానే రంగుల కల అనీ తెలియనేతేలియదు!వేరే రంగంలో సంపాదించిన డబ్బు సంచులు పట్టుకొని దళారికుక్కను పట్టుకొని గోదారి ఈదుదామని డబ్బుచేసి వస్తారు అధిక వ్యక్తులు తలల మీద గుడ్డలేసుకొని నిష్క్రమిస్తారు నిలదొక్కుకున్న వాళ్ళు తమ పుత్రరత్నాలను hero లుగా చలామణీ చేసి పుత్రోత్సాహముతో చేతులు కాల్చుకుంటారు!చిమ్మని గీసింది నగ్నచిత్రమే!

    ReplyDelete
  2. ప్రస్తుతం నల్లడబ్బుతో జూదం ఆడేవాళ్ళే ఎక్కువ అనుకుంటా.

    ReplyDelete